विवादित गीत 'लुट्न सके लुट कान्छा' का शब्दहरु

लोकदोहोरी गायक पशुपति सर्मा मनछुने गीत संगीत निकालेर सबै श्रोताको मनमा बस्न सफल व्यक्तित्व हुन् । प्राय उनका सबै गीतहरु हिट हुने गरेका छन् चाहे त्यो राष्टवादी गीत, जनचेतनाका गीत होस् या त तीजका गीत नै । आफ्नो सुरिलो स्वरले नाम अनि दाम कमाएका उनले हालसालै निकालेको लुट्न सके लुट कान्छा बोलको गीत विवादमा आएपछी युट्युबबाट हटाइएको छ । आखिर के थियो त उनको त्यो गीतमा , के शब्द चयनमा ध्यान नदिएकै हो त उनले ? यहाँहरुको राय जान्नको लागि उनका गीतका शब्दहरु जस्ताको तस्तै राखेको छु हेरेर प्रतिक्रिया दिनुहोला ।

        बोल - लुट्न सके लुट कान्छा 

हाम्रा गामको एउटा भाइ स्थायी शिक्षकमा लड्यो

स्थायी शिक्षक हुन्छु भनी पढ्नुसम्म पढ्यो

बल्ल बल्ल नाम निकाल्यो अहिले जागिर खान्छ

त्यसकै छोरो पढ्न फेरि बोडिंगतिर जान्छ

लुट्न सके लुट कान्छा, लुट्न सके लुट

अरु देशमा पाइँदैन, नेपालमै हो छुट

००००

डाक्टरले नि जागिर यहाँ सरकारी कोटामा खान्छ

बिरामी जाँच्न फेरि क्लिनिकतिर तान्छ

हाम्रा गामको अर्को भाइले सुब्बामा जागिर खायो

दुईवर्षमै घर ठड्यायो, कहाँबाट पैसो आयो ?

लुट्न सके लुट कान्छा, लुट्न सके लुट

अरु देशमा पाइँदैन, नेपालमै हो छुट...

००००

गणतन्त्र ल्यायौं भन्छन्, फाल्यौं भन्छन् राजा

त्यै फालेका राजाजस्ता कैंयौं निस्के आज

जनताको मुटुभित्र काँडा कति कति

डेढ अर्बको हेलिकप्टर चढ्छिन् राष्ट्रपति

लुट्न सके लुट कान्छा, लुट्न सके लुट

अरु देशमा पाइँदैन, नेपालमै हो छुट...

००००

वाइडबडी जहाँज किने अरे लुट्नुसम्म लुटे

सुनकाण्ड खोई कहाँ पुग्यो, जेलमै छन् कि छुटे ?

ठूलै नेता भ्रष्टाचारी न डराउँछन् लुक्छन्

कार्यकर्ता केही बुझ्दैनन्, कुकुरजस्तै भुक्छन्

लुट्न सके लुट कान्छा, लुट्न सके लुट

अरु देशमा पाइँदैन, नेपालमै हो छुट...

००००

हजुरबा नि यसै मरे बाऊ नि यसै मर्छन्

हाम्रो पनि त्यै हो गति, विकास कैले गर्छन् ?

गर्ने काम केही हैन, ठूला ठूला भाषण

स्वर्गजस्तो देशमा हजुर यमराजको शासन

लुट्न सके लुट कान्छा, लुट्न सके लुट

अरु देशमा पाइँदैन, नेपालमै हो छुट...

००००

सडकतिर त्यस्तै जात्रा ट्राफिक लाइट छैन

ट्राफिक पुलिस सीटी फुक्छ, कोहीले सुन्ने हैन

त्यति जाबो ट्राफिक लाइटलाई कति लाउँछ खर्च

हाम्ले भन्न पर्ने हो कि आफैं बुझ्न पर्छ ?

लट्न सके लुट कान्छा, लुट्न सके लुट

लुट्न सके लुट कान्छा, लुट्न सके लुट

अरु देशमा पाइँदैन, नेपालमै हो छुट...

००००

ठेकदारले नि टेन्डर पार्छ लिन्छ ठेक्का पट्टा

झनै बिजोग पार्छ छोड्छ काम भ्याउनुको सट्टा

यता गयो लुटेकै छन् लुट्छन् उता गयो

सब जनालाई लुट्नैपर्छ भन्नेमात्रै भयो

लट्न सके लुट कान्छा, लुट्न सके लुट

अरु देशमा पाईँदैन नेपालमै हो छुट...

०००००

ड्यांगडुंग गर्ने, हल्ला गर्ने ठूला मान्छे बन्छन्

तँलाई सोझो भन्दैनन् भाइ नामर्द हो भन्छन् ।

अब गर्न छोड्दे कान्छा आदर्शको खेती

केही न केही त बुझिस होला भनेपछि यति

लट्न सके लुट कान्छा, लुट्न सके लुट

अरु देशमा पाईँदैन नेपालमै हो छुट...